Тоҷикӣ | Русский | English  

Таҷлили Рӯзи байналмилалии Наврӯз дар қароргоҳи ЮНЕСКО

20 марти соли 2015 дар ш. Париж дар яке аз толорҳои бошукӯҳи қароргоҳи Созмони Милали Муттаҳид оид ба масъалаҳои маориф, илм ва фарҳанг (ЮНЕСКО) бахшида ба Рӯзи байналмилалии Наврӯз зиёфати идона барпо гардид. Чорабинии мазкур аз ҷониби Намояндагии доимии Ҷумҳурии Тоҷикистон дар ҳамкорӣ бо намояндагиҳои доимии Афғонистон, Ироқ, Қазоқистон, Озарбойҷон, Покистон, Туркманистон, Туркия, Ҳиндустон ва Эрон дар назди Созмон бо дастгирии бевоситаи Мудири кулли ЮНЕСКО Ирина Бокова ороста шуд.

Дар маросими ҷашни Наврӯз роҳбарони намояндагиҳои дипломатии кишварҳои хориҷии муқими Париж, намояндагони доимӣ дар назди ЮНЕСКО ва дигар ташкилотҳои байналхалқӣ, шахсони расмии Вазорати корҳои хориҷӣ ва дигар мақомоти Фаронса, намояндагони доираҳои соҳибкорӣ, илмӣ, фарҳангӣ ва воситаҳои ахбори оммаи Аврупо, инчунин аъзои диаспораҳои кишварҳои созмондиҳандаи ин чорабинӣ дар Белгия, Нидерланд, Швейтсария,  Италия ва Фаронса ширкат варзиданд.

Дар оғози чорабинӣ бо сухани табрикотӣ Мудири кулли ЮНЕСКО Ирина Бокова баромад намуд. Зимни суханрониаш И. Бокова нақши иди Наврӯзро дар рушди ҳамкории байнифарҳангӣ ва ҳамгироии кишварҳои ҷашнгирандаи ин ид басо баланд арзёбӣ карда, Наврӯзро ҳамчун ҳадяи арзишҳои таҳаммулпазирӣ, эҳтиром, гуногуншаклии фарҳангӣ ва сулҳу созиш номид.

Дар рафти базми идона мусиқиву таронаҳо садо доданд, навор оид ба анъанаҳои ҷашнгирии Наврӯз дар як қатор кишварҳо намоиш дода шуд, ба меҳмонон таомҳои миллӣ ва шириниҳои давлатҳои созмондиҳандаи чорабинии мазкур пешкаш гардиданд, инчунин намоишгоҳи ашёҳои рангини косибии миллӣ ва рамзҳои Наврӯз ороста шуд.     

Дар чаҳорчӯби чорабинӣ мулоқоти дуҷонибаи Намояндаи доимии Ҷумҳурии Тоҷикистон дар назди ЮНЕСКО, Сафир Рустамҷон Солиев бо Мудири кулли ЮНЕСКО Ирина Бокова барпо гардид, ки зимни он масоили мубрами ҳамкории Тоҷикистон бо ЮНЕСКО дар соҳаҳои фарҳанг, илм ва маориф муҳокима шуданд.

Аксҳо...

© 2017 Вазорати корҳои хориҷии Ҷумҳурии Тоҷикистон
© 2017 Суроға: Ҷумҳурии Тоҷикистон, 734001, Душанбе, кӯчаи Шероз 33
тел: (992 37) 2210551 (шӯъбаи умумӣ), (992 37) 2211808 (қабулгоҳ)
факс: (992 37) 2210259 E-mail: info@mfa.tj