Sülh və Milli Birliyin Qurucusu - Millətin Lideri, Tacikistan Respublikasının Prezidenti, hörmətli Emoməli Rəhmonun Pakistan İslam Respublikasının Xarici İşlər naziri Məhdum Şah Mahmud Qureşi ilə görüşü

Avqustun 25-də Millət Sarayında Sülh və Milli Birliyin Qurucusu - Millətin Lideri, Tacikistan Respublikasının Prezidenti, hörmətli Emoməli Rəhmon Pakistan İslam Respublikasının Xarici İşlər naziri Məhdum Şah Mahmud Qureşini qəbul etdi.

Görüşdə qarşılıqlı maraq doğuran müxtəlif sahələrdə ikitərəfli əməkdaşlığın inkişafı və genişləndirilməsi məsələləri geniş müzakirə olundu.

Tərəflər ikitərəfli əməkdaşlığın aktual məsələlərini, o cümlədən Pakistan İslam Respublikasının Baş naziri İmran Xanın Tacikistana rəsmi səfəri üçün aparılan hazırlıq işlərinin gedişatını müzakirə ediblər.

Görüşdə aktual beynəlxalq və regional məsələlər, ələlxüsus Əfqanıstandakı mövcud vəziyyətə xüsusi diqqət yetirilib.

Qeyd olunub ki, Əfqanıstandakı mövcud vəziyyət hazırda regionun təhlükəsizliyinə əsas təhdidlərdən biridir. Koalisiya qüvvələri Əfqanıstanın ərazisindən çıxarıldıqdan sonra ölkə humanitar fəlakətin astanasındadır.

Son günlərdə bu ölkədə yaranmış mürəkkəb və təhlükəli vəziyyət təkcə Əfqanıstan xalqının problemi deyil, həmçinin ən kəskin regional və qlobal problemlərdən biridir.

Qeyd etmək lazımdır ki, Kabildə “Taliban” hərəkatının hakimiyyətə gəlməsi bölgədəki geosiyasi prosesi daha da çətinləşdirib.

Faktlar açıq şəkildə göstərir ki, taliblər ölkədəki digər siyasi qüvvələrin geniş iştirakı ilə müvəqqəti keçid hökumətinin qurulmasına dair verdikləri əvvəlki vədlərindən imtina edirlər və İslam əmirliyi yaratmağa hazırlaşırlar.

Tacikistan Əfqanıstan xalqına, o cümlədən taciklər, özbəklər və digər milli azlıqlara qarşı edilən qanunsuzluğun, qətillərin, soyğunçuluğun və təqibin bütün formalarını şiddətlə qınayır.

Görüşdə qeyd olundu ki, çox əzablar görmüş Əfqanıstan və onun bizə dost və qardaş olan xalqı bir daha qanlı və təhrik edilmiş müharibələrin burulğanına salınamalıdır. 

Əfqanıstanın yaxın qonşusu olaraq Tacikistan hər zaman davamlı sülhün və sabitliyin bərpasını dəstəkləyir və bu mövqeyə sadiqdir.

Tacikistan tərəfi vurğuladı ki, qonşu ölkənin siyasi təhlükəsizlik problemlərini təcili həll etmək üçün bütün milli azlıqların, o cümlədən ölkə əhalisinin 46%-ni təşkil edən Əfqanıstan taciklərinin iştirakı ilə inkluziv hökumət yaratmaq lazımdır.

Qonşu ölkənin dövlət quruluşu bütün ölkə vətəndaşlarının iradəsinin ifadəsi kimi və mövqeyi nəzərə alınmaqla müəyyən edilməlidir.

Tacikistan, bütün Əfqanıstan xalqının, xüsusən də bütün milli azlıqların mövqeyi nəzərə alınmadan, bu ölkədə zülm və təqib yolu ilə qurulan heç bir hökuməti tanımayacaq.

Vurğulandı ki, taciklər gələcək Əfqanıstan hökumətində öz layiqli yerlərini tutmalıdırlar.

Tacikistan beynəlxalq ictimaiyyəti Əfqanıstanda sülh və sabitliyin təmin edilməsi, mürəkkəb siyasi şəraitin və təhlükəsizliklə bağlı vəziyyətin ən qısa zamanda danışıqlar yolu ilə sabitləşdirilməsi üçün təcili tədbirlər görməyə çağırır.

Beynəlxalq birliyin Əfqanıstandakı mövcud vəziyyətə biganə yanaşması bu ölkədə uzun sürən vətəndaş müharibəsinə səbəb ola bilər.

Tacikistanın qonşu Əfqanıstanda sülhün, sabitliyin və təhlükəsizliyin tez bir zamanda bərpasına sadiq olduğu və Birləşmiş Millətlər Təşkilatının bu prosesin irəliləməsində əsas rol oynamalı olduğu vurğulandı.

Dünya nizamının və Tacikistanın milli birlik təcrübəsinə əsaslanaraq Millət Lideri, hörmətli Emoməli Rəhmon Pakistan tərəfini qonşu ölkədə sülhün, sabitliyin və davamlı inkişafın təmin edilməsinə dair təklifləri ilə tanış etdi.