Сафари кории Вазири корҳои хориҷии Тоҷикистон ба Канада

2 октябри соли 2015 бо даъвати Донишкадаи об, муҳити зист ва тандурустии Донишгоҳи СММ Вазири корҳои хориҷии Ҷумҳурии Тоҷикистон Сироҷидин Аслов ба Канада сафари корӣ анҷом дод.

Дар чаҳорчӯби боздид аз Донишгоҳи СММ дар шаҳри Торонто дар рафти маросими махсус ба Вазири корҳои хориҷии Тоҷикистон ҷоизаи “Water Catalyst Award” супурда шуд. Ҷоизаи мазкур аз ҷониби Донишгоҳи СММ таъсис дода шуда, ҳамасола ба ходимони намоёни сиёсӣ ва илмӣ, ки дар пешрафти масъалаҳои ҷаҳонии об нақши арзанда гузоштаанд, супорида мешавад.

Дар рафти маросим, ки намояндагони ҷомеаи илмӣ,  коршиносон ва ҳамчунин корпуси дипломатӣ ширкат доштанд, директори Донишкада доктор Зафар Одил нақши Ҷумҳурии Тоҷикистон ва Президенти кишвар Эмомали Раҳмонро дар ҷалби таваҷҷуҳи ҷомеаи ҷаҳонӣ ба проблемаи об ва беҳдошт, ҳамчунин зарурати рушди ҳамкорӣ дар сатҳҳои миллӣ, минтақавӣ ва ҷаҳонӣ махсусан таъкид намуд.

Баъд аз супурдани ҷоиза Сироҷидин Аслов ибтикороти ҷаҳонии Ҷумҳурии Тоҷикистонро дар соҳаи об ба ҳозирин муаррифӣ намуд. Дар баромади худ Вазир С.Аслов, аз ҷумла аҳли толорро  бо натиҷаҳои ниҳоии даҳсолаи байналмилалии амал “Об барои ҳаёт”, 2005-2015 шинос карда, ташаббуси  Президенти кишварро доир ба эълон кардани даҳсолаи нави байналмилалӣ зери шиори “Об барои рушди устувор” пешниҳод намуд.