Вазири корҳои хориҷии Қазоқистон бо сафари расмӣ вориди Тоҷикистон шуд

24 январи соли 2024 муовини Сарвазир, вазири корҳои хориҷии Ҷумҳурии Қазоқистон Мурат Нуртлеу бо сафари расмӣ ба Ҷумҳурии Тоҷикистон ташриф овард.

Роҳбари Вазорати корҳои хориҷии Қазоқистонро дар Фурудгоҳи байналмилалии Душанбе муовини вазири корҳои хориҷии Тоҷикистон Фаррух Шарифзода ва дигар шахсони расмӣ пешвоз гирифтанд.

Тибқи барномаи сафар М.Нуртлеу бо вазири корҳои хориҷии Тоҷикистон Сироҷиддин Муҳриддин мулоқот намуда, бо намояндагони корхонаву ширкатҳои бонуфузи Тоҷикистон вохурӣ хоҳад кард. Дар барномаи сафар ҳамчунин иштироки роҳбари Вазорати корҳои хориҷии Қазоқистон дар маросими гулчанбаргузорӣ дар назди муҷассамаи Исмоили Сомонӣ дар майдони Дӯстии пойтахт ва муҷассамаи нерӯҳои сулҳовари қазоқистонӣ дар Тоҷикистон дар боғи ба номи Абдулқосим Фирдавсӣ пешбинӣ шудааст.

Интизор меравад, ки Президенти Ҷумҳурии Тоҷикистон, Пешвои миллат, муҳтарам Эмомалӣ Раҳмон вазири корҳои хориҷии Қазоқистонро ба ҳузур мепазирад.

Саҳифаҳои расмии Вазорати корҳои хориҷии Ҷумҳурии Тоҷикистон дар шабакаҳои иҷтимоӣ:

Мо дар Фейсбук: www.facebook.com/mfa.tj

Мо дар Твиттер (русӣ): www.twitter.com/MID_Tajikistan

Мо дар Телеграм: t.me/mfa_tj

Мо дар Инстаграм: instagram.com/mfa_tjk

Мо дар Твиттер (англисӣ): twitter.com/MOFA_Tajikistan