Ҷашни 600 солагии Абдураҳмони Ҷомӣ дар Тошканд

28 ноябри 2014 дар ш. Тошканд бахшида ба бузургдошти 600 солагии Мавлоно Нуриддин Абдураҳмони Ҷомӣ, шоир ва нависандаи маъруфу хушкаломи Машриқзамин, маҳфили адабию фарҳангӣ баргузор шуд.

Дар чорабинии мазкур, ки дар толори асосии бинои Маркази байналмилалии фарҳангии Ҷумҳурии Ӯзбекистон барпо шуд, аҳли илму адаб, шоирону нависандагон, устодону донишҷӯён, толибилмони мактабҳои таҳсилоти умумӣ ва намояндагони Сафорати Ҷумҳурии Тоҷикистон дар Ҷумҳурии Ӯзбекистон ширкат варзиданд.

Аҳли маҷлиси тантанавӣ хидматҳои шоистаи ин адиб ва олими забардасти тоҷику форсро, ки ба хазинаи тамаддуни инсоният саҳми босазо ва аз худ номи нек ба ёдгор гузоштааст, басо муҳим донистанд. Нақши ин абармарди сухан дар ғанӣ гардонидани фарҳанги ҷаҳонӣ ва ташаккули ғояҳои тарбиявӣ (бо ишора ба шоҳасари тарбиявӣ-ахлоқии ӯ “Баҳористон”) баланд арзёбӣ гардид. Тамоми офаридаҳои Мавлоно Абдураҳмони Ҷомӣ, ки бар васфи инсони комил ва бар манфиати мардумони гуногунтабақа бахшида шудаанд, ҳамчун нақши шоёни ин суханвари фарзона дар таҳкими арзишҳои волои дунявӣ, ба монанди инсонпарварӣ, меҳандустӣ, ватанхоҳӣ, дӯстии содиқона, ҳамсозӣ ва ҳамбастагии халқҳо, маънидод гардиданд. Осори манзуми ин ҳомии қудрату фазилати муқаддастарин фарди ҷомеа зан-Модар бо мисраҳои:

Сар зи модар макаш, ки тоҷи шараф
Гарде аз роҳи модарон бошад.
Хок шав зери пойи ӯ, ки биҳишт
Дар қадамҳои модарон бошад - мавриди ситоиш қарор гирифт.

Мактаббачагон аз эҷодиёти гуногунжанру пурмуҳтаво ва осори гаронқадри Мавлоно Абдураҳмони Ҷомӣ қироат намуданд. Овозхонони маъруфу мумтози тоҷикзабони Ӯзбекистон Мунира Муҳаммедова ва Гулчеҳра Бақоева бо сурудҳои дилнишини худ ба маҳфил шукуҳу ранги хоса ва ҳусни идона бахшиданд.

Ҳамчунин бахшида ба бузургдошти 600 солагии Мавлоно Абдураҳмони Ҷомӣ, соли ҷорӣ дар Ӯзбекистон китобҳои “Рисолаи аруз” ва “Абдураҳмон Жомийнинг ижод олами” ба забонҳои тоҷикию ӯзбекӣ чоп гардид, ки дар онҳо мақолаҳои шоирону нависандагон ва дигар аҳли илму фарҳанги кишвари дуст ҷамъоварӣ гардидааст.

Сафири Тоҷикистон дар Ӯзбекистон М. Ҳусейнов низ саҳми арзандаи ин гуҳаршиноси забардастро дар таҳкими робитаҳои анъанавии дӯстонаю фарҳангии ду халқи бародар баланд арзёбӣ кард. Дар бораи қадрдонии Мавлоно Абдураҳмони Ҷомӣ аз ҷониби роҳбарияти олии кишварамон сухан ронда, ташаббуси Президенти муҳтарами Ҷумҳурии Тоҷикистон дар бораи эълон гардидани соли 2014 дар Тоҷикистон соли Абдураҳмони Ҷомӣ ва дар ин робита барпо намудани як силсила чорабиниҳои мухталиф дар саросари кишвар ва фаротар аз он махсусан таъкид гардид. Чунин ҳамоишҳои илмию адабии муштарак посухгӯи тақозои замон номида шуданд. Гуфта шуд, ки нишастҳои фарҳангӣ мардумони ду кишвари ҳамҷаворро наздиктар карда, ҳамчун пул дар масири таҳким ва густариши муносибатҳои дуҷонибаи дустона хидмат менамоянд.