Ҷавоншер Ҳайдарӣ даргузашт
Шаби 20 ба 21 январи соли равон Раиси Иттиҳоди синамогарони Афғонистон ва шахсияти фаъоли иҷтимоӣ Ҷавоншер Ҳайдарӣ ба синни 68- солагӣ бар асари сактаи қалбӣ дар шаҳри Кобул даргузашт.
Ҷавоншер Ҳайдарӣ фарҳангӣ ва ҳунарманди маъруф буда, тайи беш аз 40 сол барои рушди синамои Афғонистон хидмати арзанда намуд. Ӯ пуштибон ва ҳимоятгари қавии фарҳангиён ва ҳунармандон буд.
Ҷавоншер Ҳайдарӣ аз дӯстони самимии Ҷумҳурии Тоҷикистон, мардум ва фарҳангиёни мо буд. Ӯ дар саргаҳи таъсиси Анҷумани тоҷикони ҷаҳон қарор дошт ва узви Раёсати он буд. Ӯ ба ҳайси сарвари шуъбаи Пайванд дар Афғонистон барои густариши фаъолияти он талоши фидокорона дошт.
Ҷавоншер Ҳайдарӣ бо мақомоти давлатӣ ва фарҳангиёни Тоҷикистон равобит ва ҳамкории наздик ва созанда дошт. Ӯ чанд филм ва маводи ҳуҷҷатӣ дар мавриди корномаҳои Пешвои миллат ва дастовардҳои Тоҷикистони соҳибистиқлол таҳия намудааст.
Марги ин фарҳангии пурталоши кишвари дӯст талафоти ҷиддӣ аст.
Равонаш шод бод.
