Таҷлили Иди байналмилалии Наврӯз дар шаҳри Лондон

25 марти соли 2023 дар шаҳри Лондон ба мақсади таҷлили Иди байналмилалии Наврӯз бо ибтикори Сафорати Ҷумҳурии Тоҷикистон дар Подшоҳии Муттаҳидаи Британияи Кабир ва Ирландияи Шимолӣ барномаи фарҳангӣ-фароғатӣ ташкил ва баргузор гардид, ки дар он зиёда аз 150 нафар ҳамватанони муқими Британияи Кабир иштирок намуданд.

Қабл аз оғози барномаи консертӣ дар толори бошукӯҳ тибқи анъанаҳои наврӯзӣ дастурхони “7 син ва 7 шин” ороста шуд. Барномаи фарҳангии идонаро намояндаи Сафорати Ҷумҳурии Тоҷикистон дар Подшоҳии Муттаҳида ҳусни оғоз бахшида, аснои сухани ифтитоҳии худ ҳамаи ҳозиринро бо Иди байналмилалии Наврӯз самимона шодбош гуфт.

Сипас хотири ҳамаи меҳмононро ҳунармандони хушовоз ва маъруфи Ҷумҳурии Тоҷикистон – Давлат Назрӣ ва Ситораи Кароматулло, ки бо даъвати Намояндагии дипломатӣ маҳз барои ин ҷашн ба Лондон ташриф оварда буданд, бо сурудҳои ҷаззобу дилнишини худ шод намуданд.