Муносибатҳои Тоҷикистон бо Ҷумҳурии Арабии Миср

01.03.2013 10:10

Муносибатҳои дипломатӣ байни Ҷумҳурии Тоҷикистон ва Ҷумҳурии Арабии Миср якуми апрели 1993 барқарор гардидаанд. Миср истиқлолияти Ҷумҳурии Тоҷикистонро якуми январи 1992 ба расмият шинохт.

13 апрели 2018 Сафири Фавқулода ва Мухтори Ҷумҳурии Арабии Миср дар Ҷумҳурии Тоҷикистон Иҳаб Аҳмед Талаат Наср таъин гардидааст.

Дар ҳошияи 7-умин гирдиҳамоии Сарони давлатҳои узви Созмони Конфронси Исломӣ декабри 1994 дар Дорулбайзо мулоқоти Президенти Ҷумҳурии Тоҷикистон,муҳтарам Эмомалӣ Раҳмон бо Президенти Ҷумҳурии Арабии Миср Ҳуснӣ Муборак доир гардид.

4 феврали 2007 Президенти Ҷумҳурии Тоҷикистон бо сафари расмӣ аз Ҷумҳурии Арабии Миср боздид ба амал овард. Зимни суҳбати роҳбарони ду давлат аҳаммияти рушди муносибатҳои дӯстона миёни ду кишвар таъкид гардида, панҷ санади ҳамкорӣ ба имзо расид.

Заминаи меъёрӣ-ҳуқуқии ҳамкориҳои дуҷонибаи Тоҷикистону Мисрро 9 санади ҳамкорӣ ташкил медиҳад.

Дар ростои таҳкиму густариши ҳамкориҳои иқтисодӣ-тиҷорӣ мутақобилан судманд ҷаласаи аввали Комиссияи муштараки байниҳукуматии Ҷумҳурии Тоҷикистон ва Ҷумҳурии Арабии Миср оид ба ҳамкориҳои иқтисодӣ, тиҷоратӣ ва илмию техникӣ 23-27 январи 2009 дар Душанбе баргузор гардид. Қарор аст, ҷаласаи навбатии Комиссияи байниҳукуматӣ нимаи дуюми соли 2019 дар Қоҳира баргузор шавад.

Бо дарназардошти муносибатҳои неки мутақобила,байни Тоҷикистону Миср якдигарфаҳмӣ ва мавқеи муштарак вуҷуд дошта, дар ҷаласаву конфронсҳои байналмилалӣ ва саммитҳо кишварҳо якдигарро дастгирӣ менамоянд.

 Дар заминаи созишномаҳои ҳамкорӣ дар соҳаи маориф, бо истифода аз бурсияҳои давлатӣ табодули муҳассилон ба роҳ монда шудааст ва даҳҳо донишҷӯёни тоҷик дар донишгоҳҳои Қоҳира ва Айни Шамс дар Миср ва теъдоди зиёди донишҷӯён ва аспирантҳои мисрӣ дар Тоҷикистон таҳсил менамоянд.

Нигористон

Тақвим