Бузургдошти ҷашни Истиқлол дар Берлин ва Алмаато

19 сентябри соли 2023 Сафорати Ҷумҳурии Тоҷикистон дар Ҷумҳурии Федеративии Олмон бахшида ба 32-юмин солгарди Истиқлоли давлатии Ҷумҳурии Тоҷикистон пазироии расмӣ баргузор намуд.

Дар чорабинӣ як қатор меҳмонони воломақом, аз ҷумла Котиби давлатии парлумонӣ дар Вазорати ҳамкориҳои иқтисодӣ ва рушди Олмон (BMZ) Нилс Аннен, вакилони Бундестаг, намояндагони аршади вазорату идораҳои марбута, роҳбарони корпуси дипломатии муқими Берлин, муассисаҳои илмӣ-фарҳангӣ, бахши хусусӣ, матбуот, ҳамчунин ҳамватанони бурунмарзӣ иштирок доштанд.

Сафири Тоҷикистон дар Олмон Имомуддин Сатторов дар сухани шодбошии худ таваҷҷуҳи ҷамъомадагонро ба муҳимияти Истиқлолият, ҳифзи арзишҳои он, дастовардҳои даврони соҳибихтиёрӣ, инчунин дар бораи дурнамо ва рушди ҳамкориҳои судманди фарогир байни Тоҷикистону Олмон ҷалб кард.

Баъд аз анҷоми қисмати расмӣ ба меҳмонон дастурхони миллӣ ороста шуд.

19 сентябр дар шаҳри Алмаато ба ифтихори 32-юмин солгарди Истиқлолияти давлатии Ҷумҳурии Тоҷикистон чорабинии тантанавӣ ва пазироии расмӣ баргузор гардид.

Дар чорабинӣ роҳбари намояндагии Вазорати корҳои хориҷии Ҷумҳурии Қазоқистон дар шаҳри Алмаато, роҳбарон ва намояндагони Акимати шаҳри Алмаато, консулони генералии кишварҳои хориҷӣ, роҳбарони созмонҳои байналмилалӣ ва минтақавӣ, кормандони корпуси дипломатии муқими шаҳри Алмаато, зиёиён, соҳибкорони қазоқистонӣ, ҳамватанони бурунмарзӣ ва донишҷӯёни тоҷик иштирок намуданд.

Консули генералӣ дар баромади ифтитоҳӣ аз дастовардҳои назарраси кишвар дар даврони Истиқлолият таҳти роҳбарии Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон, муҳтарам Эмомалӣ Раҳмон ва нақши афзояндаи Тоҷикистонро дар арсаи байналмилалӣ ёдовар шуд.

Чорабинии тантанавӣ бо намоиши рақсу сурудҳои тоҷикӣ ҳусни анҷом пазируфт.

Саҳифаҳои расмии Вазорати корҳои хориҷии Ҷумҳурии Тоҷикистон дар шабакаҳои иҷтимоӣ:

Мо дар Фейсбук: www.facebook.com/mfa.tj

Мо дар Твиттер (русӣ): www.twitter.com/MID_Tajikistan

Мо дар Телеграм: t.me/mfa_tj

Мо дар Инстаграм: instagram.com/mfa_tjk

Мо дар Твиттер (англисӣ): twitter.com/MOFA_Tajikistan