Ширкат дар Нишасти қутбии “Як cайёра”
10 ноябри соли 2023 бо ибтикори ҷониби Фаронса дар шаҳри Париж Нишасти қутбии “Як cайёра” баргузор гардид, ки дар он ҳайати Тоҷикистон зери роҳбарии вазири корҳои хориҷӣ Сироҷиддин Муҳриддин ширкат варзид.
Нишасти мазкур сарони давлатҳо ва ҳукуматҳо, намояндагони баландпояи кишварҳо, муҳаққиқону олимон, роҳбарони ниҳодҳои байналмилалӣ, созмонҳои ғайридавлатӣ, намояндагони мардуми бумӣ ва ҷомеаҳои маҳаллӣ ва бахши хусусиро аз кишварҳои гуногун ба мақсади баррасии чолишҳои тағйирёбии иқлим, алалхусус вазъи пиряхҳо дар сайёра ба ҳам овард.
Иштирокчиёни нишаст перомуни вазъи пиряхҳо ва чолишҳои марбут ба онҳо табодули ақида карда, мушкилоти мавҷударо дар заминаи фурӯпошии криосфера дар миқёси ҷаҳон, ки метавонад ба аҳолӣ ва экосистема дар маҷмӯъ, захираҳои об ва болоравии сатҳи баҳр таъсир расонад, ташвишовар номидан ва ҳамкории амиқи байналмилалиро дар ин ҷода муҳим арзёбӣ карданд.
Вазири корҳои хориҷӣ Сироҷиддин Муҳриддин зимни андешарониаш бо ишора ба натиҷаҳои конфронсҳои Даҳсолаи байналмилалии амал “Об барои рушди устувор, солҳои 2018-2028” ва махсусан қабули Қатъномаи Маҷмаи Умумии Созмони Милал дар бораи эълон намудани соли 2025 ҳамчун “Соли байналмилалии ҳифзи пиряхҳо”, талошҳои Ҳукумати Тоҷикистонро дар ин масъала ёдрас гардид ва зикр кард, ки татбиқи уҳдадориҳо дар доираи конфронсҳо ва ҳадафҳои “Соли байналмилалии ҳифзи пиряхҳо” ҷиҳати расидан ба Ҳадафи шашуми Ҳадафҳои Рушди Устувор ва ҳалли дигар масъалаҳои вобаста ба тағийрёбии иқлим дар сайёра мусоидат хоҳад кард.
Таъкид гардид, ки соли 2024 дар шаҳри Душанбе Конфронси сеюми сатҳи баланд оид ба татбиқи Даҳсолаи “Об барои рушди устувор”, ҳамчунин, соли 2025 Конфронси байналмилалӣ оид ба ҳифзи пиряхҳо баргузор мегардад ва ширкати фаъоли ҷомеаи ҷаҳонӣ дар ин чорабиниҳои муҳимми байналмилалии Тоҷикистон дар амри ҳаллу фасли мушкилоти марбут ба об ва обшавии пиряхҳо мусоидат хоҳад намуд.
Саҳифаҳои расмии Вазорати корҳои хориҷии Ҷумҳурии Тоҷикистон дар шабакаҳои иҷтимоӣ:
Мо дар Фейсбук: www.facebook.com/mfa.tj
Мо дар Твиттер (русӣ): www.twitter.com/MID_Tajikistan
Мо дар Телеграм: t.me/mfa_tj
Мо дар Инстаграм: instagram.com/mfa_tjk
Мо дар Твиттер (англисӣ): twitter.com/MOFA_Tajikistan
