Хабар дар робита ба тамдиди муҳлати эътибори раводид ва бақайдгирии шаҳрвандони хориҷӣ

Вазорати корҳои хориҷии Ҷумҳурии Тоҷикистон хабар медиҳад, ки  бо дарназардошти ҳамагирии коронавируси COVID-19 ва вазъи бавуҷудомадаи эпидемиологӣ, муҳлати эътибори раводид ва бақайдгирии шаҳрвандони хориҷӣ ва шахсони бешаҳрвандӣ, ки муваққатан дар ҳудуди Ҷумҳурии Тоҷикистон қарор доранд, то ба эътидол омадани вазъи эпидемиологӣ тамдид мешавад.

Шаҳрвандони хориҷӣ ва шахсони бешаҳрвандӣ барои тамдиди раводид метавонанд ба Сарраёсати консулии Вазорати корҳои хориҷӣ, намояндагии Вазорати корҳои хориҷӣ дар вилояти Суғд ва ҷиҳати тамдиди муҳлати бақайдгирӣ ба воҳидҳои сохтории Хадамоти шиносномавию бақайдгирии Вазорати корҳои дохилии Ҷумҳурии Тоҷикистон муроҷиат намоянд.

Бояд таъкид кард, ки тамоми дархостҳои шаҳрвандони хориҷӣ ва шахсони бешаҳрвандӣ мувофиқи тартиби муқарраргардидаи қонунгузории кишвар мавриди баррасӣ ва иҷрои фаврӣ қарор дода мешаванд.