Мулоқоти Вазири корҳои хориҷии Тоҷикистон бо Котиби давлатии ИМА
1 июли 2021 дар Вашингтон мулоқоти Вазири корҳои хориҷии Ҷумҳурии Тоҷикистон Сироҷиддин Муҳриддин бо Котиби давлатии Иёлоти Муттаҳидаи Америка Энтони Блинкен баргузор гардид.
Дар вохӯрӣ ҷонибҳо муносибатҳои дуҷонибаи Тоҷикистону Америка дар соҳаҳои сиёсат, амният, иқтисод, энергетика, тандурустӣ, сайёҳӣ, гуманитарӣ, ҳамкорӣ дар чорчӯби барномаҳои АРБИМА, иқдомҳои муштарак ҷиҳати пешгирии ҳамагирии Ковид-19 ва ғайраро баррасӣ карда, перомуни масъалаҳои ҳамкориҳои байналмилалӣ ва минтақавӣ табодули афкор намуданд.
Ҷонибҳо зимни баррасии вазъият дар минтақа зарурати таҳкими ҳамкориҳоро дар самти муборизаи муштарак бо хатару таҳдидҳои муосир, аз ҷумла терроризм, ифротгароӣ, гардиши ғайриқонунии маводди мухаддир ва дигар ҷиноятҳои муташаккили фаромиллӣ таъкид карданд.
