Подшоҳии Арабистони Саудӣ 11 январи 1992 истиқлолияти Ҷумҳурии Тоҷикистонро ба расмият шинохт. 22 феврали 1992 робитаҳои дипломатии Ҷумҳурии Тоҷикистон ва Подшоҳии Арабистони Саудӣ барқарор гардидаанд. Сафорати Ҷумҳурии Тоҷикистон дар Риёз моҳи сентябри 2008 кушода шуд. Сафорати Подшоҳии Арабистони Саудӣ дар Душанбе соли 2010 ифтитоҳ ёфт.
Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон 5 маротиба бо сафарҳои расмӣ ва корӣ (солҳои 1997, 2001, 2005, 2016 ва 2017) ба Подшоҳии Арабистони Саудӣ ташриф овардаанд, ки дар раванди рушди муносибатҳои дуҷониба нақши калидӣ ва таъсиргузор доранд. Дар рафти ин сафарҳо мулоқоту музокироти Президенти Ҷумҳурии Тоҷикистон бо Подшоҳ ва Валиаҳди Арабистони Саудӣ, ҳамчунин дигар шахсони воломақоми он кишвар доир гардиданд.
Дар мавриди тамосҳои сатҳи баланди сиёсӣ ишора намудан ба сафари расмии собиқ Вазири корҳои хориҷии Арабистони Саудӣ шоҳзода Сауд Ал-Файсал ба Тоҷикистон соли 1992, боздиди собиқ Вазири корҳои хориҷии ҶТ Ҳ.Зарифӣ аз Риёз 2007, сафари расмии Вазири корҳои хориҷии кишвар С. Муҳриддин ба Арабистони Саудӣ соли 2014, ҳамчунин боздиди собиқ Муовини Сарвазири Ҷумҳурии Тоҷикистон Азим Иброҳим аз Риёз (25 январи 2015) бамаврид аст.
Иштироки маҷозии Вазири корҳои хориҷии Арабистони Саудӣ Файсал ибни Фарҳон бар асоси даъвати Вазири корҳои хориҷии Тоҷикистон дар кори Конфронси “Қалби Осиё-Раванди Истанбул”, ки 30 марти 2021 дар Душанбе баргузор гардид, таваҷҷуҳи муштараки ҷонибҳоро ба раванди таъмини сулҳу субот ва бозсозии Афғонистон ба намоиш гузошт.
Ҳамкории байнипарлумонии Тоҷикистону Арабистон яке аз абзорҳои муҳимми муносибатҳои ду кишвар маҳсуб мегарданд. Дар ин замина 24-26 майи соли 2016 Раиси Маҷлиси Шӯрои Шоҳигарии Арабистони Саудӣ доктор Абдуллоҳ ибни Муҳаммад ибни Иброҳим Оли Шайх ба Ҷумҳурии Тоҷикистон сафари расмӣ намуд. Сафари ҷавобии собиқ Раиси Маҷлиси намояндагони Маҷлиси Олии Ҷумҳурии Тоҷикистон ба Саудӣ 21 январи соли 2017 доир гардид.
20 майи 2017 дар Риёз Саммити кишварҳои арабию мусулмонӣ ва Америка баргузор гардид, ки дар он Президенти Ҷумҳурии Тоҷикистон иштирок намуда, суханронӣ карданд ва бо якчанд сарони кишварҳои мусалмонӣ мулоқот анҷом доданд.
Аз лиҳози густаришу тавсеаи ҳамкориҳо таъсиси Комиссияи муштараки байниҳукуматӣ оид ба ҳамкориҳои иқтисодию тиҷоратӣ ва илмию техникӣ аҳамияти хосса дорад. Ҷаласаи якуми Комиссия 28-29 августи 2013 дар Душанбе баргузор гардид. Шӯрои соҳибкорон ҳамчун абзори ҳамоҳангсози ҳамкориҳои бахши хусусии ду кишвар таъсис ёфт. Инчунин рӯзҳои 1-4 апрели 2018 иҷлоси дуюми Комиссияи муштараки байниҳукуматии ҳамкории иқтисодию тиҷоратӣ ва илмию техникии Тоҷикистону Арабистони Саудӣ дар Риёз ва дар ҳошияи он ду форуми соҳибкорӣ дар шаҳрҳои Риёз ва Ҷидда баргузор гардид.
Ҷумҳурии Тоҷикистон бо Бонки Исломии Рушд ва Сандуқи Саудӣ оид ба рушд дар соҳаҳои тандурустӣ ва маориф, бахшҳои инфрасохтори роҳ, энергетика, кишоварзӣ ва ғайра ҳамкории босамарро ба роҳ мондааст.
Робитаҳои фарҳангиву гуманитарӣ ва маърифатӣ омили муҳимми тақвияти ҳамкориҳо ба ҳисоб мераванд. 5-9 май 2018 Рӯзҳои фарҳанги Арабистони Саудӣ дар Тоҷикистон баргузор гардид.
Сафари расмии Вазири корҳои дохилии Арабистони Саудӣ шоҳзода Абдулазиз ибни Сауд ба Тоҷикистон моҳи ноябри соли 2018 ва дидору мулоқотҳои ӯ бо Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон ва дигар масъулини баландпояи кишвар омили муҳимми рушди ҳамкориҳои минбаъадаи ниҳодҳои ҳифзи ҳуқуқи ҷонибҳо ба шумор меравад.
Ду кишвар дар доираи Созишномаи дуҷониба оид ба ҳамкорӣ дар соҳаи мубориза бо ҷинояткорӣ ва дигар санадҳои бисёрҷонибаи байналмилалӣ ҳамкорӣ ва ҳамоҳангсозиҳоро дар самти амният ва мубориза бо терроризму ифротгароӣ ва дигар зуҳуроти номатлуб ба роҳ мондаанд.