Тартиби додани шиносномаҳои хориҷӣ 

«Шиносномаи хориҷӣ ва шаҳодатномаи бозгашт ва Ҷумҳурии Тоҷикистон»

Тартиби додани шиносномаҳои хориҷӣ
ва шаҳодатномаи бозгашт
ба Ҷумҳурии Тоҷикистон

Дар асоси кадом санадҳои меъёри ҳуқуқӣ ба шаҳрвандони Тоҷикистон шиносномаи хориҷӣ дода мешавад?

• Қонуни Ҷумҳурии Тоҷикистон «Дар бораи санадҳои меъёрии ҳуқуқӣ»
• Фармони Президенти Ҷумҳурии Тоҷикистон "Дар бораи ҷорӣ намудани шиносномаҳои хориҷии шаҳрвандони Ҷумҳурии Тоҷикистон, ки дорои маълумоти электронӣ мебошад" аз 20 феврали соли 2009, № 624
• “Қоидаҳои додани шиносномаҳои хориҷии дорои маълумоти электронӣ ва шаҳодатномаи бозгашт ба Ҷумҳурии Тоҷикистон ба шаҳрвандони Ҷумҳурии Тоҷикистон”, ки бо қарори Ҳукумати Ҷумҳурии Тоҷикистоназ 2 апрели соли 2009, № 203 тасдиқ шудааст.

Сафорати Ҷумҳурии Тоҷикистон дар Ҷумҳурии Ӯзбекистон ба кӣ шиносномаҳои хориҷӣ медиҳад?

Ба шаҳрвандони Ҷумҳурии Тоҷикистон, ки дар давлати будубоши намояндагии дипломатӣ ё муассисаи консулӣ ва ё ҳавзаи консулии он истиқомати доимӣ ё будубоши муваққатӣ доранд.

Барои гирифтани шиносномаи хориҷӣ аз Сафорати Ҷумҳурии Тоҷикистон дар Ҷумҳурии Ӯзбекистон кадом ҳуҷҷатҳо зарур мебошанд?

-Ариза ба номи Сафорат (шакли муқарраршуда);

-шиносномаи шаҳрванди Ҷумҳурии Тоҷикистон ва нусхаи он;

-шиносномаи хориҷии эътибордошта ва нусхаи он;

-шаҳодатномаи таваллуд ва нусхаи он;

- шаҳодатномаи акди никоҳ ва нусхаи он (дар ҳолатҳои дахлдор);

-ҳуҷҷати тасдиқкунандаи қонунӣ будани будубоши шаҳрванд дар кишвари иқомат (виза, корти иқомат);

-расид дар бораи пардохти хироҷи консулӣ.            

Ҳангоми барасмиятдарории шиносномаи хориҷӣ, Сафорати Ҷумҳурии Тоҷикистон дар Тошканд бо мақсади муайян намудани мансубияти муроҷиаткунанда ба шаҳрвандии Ҷумҳурии Тоҷикистон ва мансуб набудани ӯ ба шаҳрвандии давлати дигар метавонад ҳуҷҷатҳои иловагиро талаб намояд.

Дар ҳолати гум шудани шиносномаи хориҷӣ чӣ бояд кард?

Дар ҳолати гум шудани шиносномаи хориҷӣ дар хориҷа, соҳиби он бояд фавран ба мақомоти корҳои дохилии кишвари будубош, инчунин ба Сафорати Ҷумҳурии Тоҷикистон дар Тошканд барои ҳифзи ҳуқуқу манфиатҳояш ва гирфитани Шаҳодатномаи бозгашт ба Ватан хабар диҳад.
  

Шаҳодатномаи бозгашт ба Ҷумҳурии Тоҷикистон чӣ гуна ҳуҷҷат аст?

Шаҳодатномаи бозгашт ба Ҷумҳурии Тоҷикистон – ин ҳуҷҷати муваққатии муайянкунандаи шахсияти шаҳрванди Ҷумҳурии Тоҷикистон буда, ҳуқуқи ӯро барои бозгашт ба Ҷумҳурии Тоҷикистон таъмин менамоянд ва ба мӯҳлати на зиёда аз 30 рӯз дода мешавад.

Шаҳодатномаи бозгашт танҳо барои баргаштани шаҳрванд ба Ҷумҳурии Тоҷикистон дода шуда, барои буду бош дар хориҷа асос шуда наметавонад. Шаҳодатномаи бозгашт ба шахси муроҷиаткунанда то баргаштани ӯ ба Ватан танҳо як маротиба дода мешавад.

 Барои гирифтани шаҳоданомаи бозгашт ба Ҷумҳурии Тоҷикистон кадом ҳуҷҷатҳо заруранд?

1. Ариза ба номи Сафорат (шакли муқарраршуда);
2. Нусхаи шиносномаи дохилӣ;
3. Нусхаи шиносномаи хориҷӣ;
4. Ду адад сурат (3х4).

Судури шиносномаи хориҷӣ дар кадом ҳолатҳо рад карда мешавад?

Ба шаҳрванди Ҷумҳурии Тоҷикистон метавонад муваққатан дар ҳолатҳои зерин додани шиносномаи хориҷӣ рад карда шавад, агар:

• • ӯ аз маълумоте, ки сирри давлатӣ дорад, воқиф бошад - то гузаштани мӯҳлати муқарраршуда аз лаҳзаи ба анҷом расидани рухсати шаҳрванд ба ин маълумот. Мӯҳлати зикргардида набояд аз 5 сол зиёд бошад, он мумкин аст аз ҷониби Комиссия, ки Ҳукумати Ҷумҳурии Тоҷикистон бо тартиби инфиродӣ бо дарназардошти далели собитгардидаи шиносоии шаҳрванд бо маълумоте, ки сирри давлатӣ дорад, таъсис додааст, тамдид карда шавад. Мансубияти маълумот ба маълумоте, ки сирри давлатӣ дорад мутобиқи конунгузорӣ, ки ҳифзи маълумоти махфиро танзим менамояд, анҷом дода мешавад;
  • ӯ ҳамчун гумонбар дар содир намудани ҷиноят дастгир шудааст ё ин ки ба сифати айбдоршаванда ба ҷавобгарӣ кашида шудааст - то баровардани қарор доир ба парванда ё қувваи қонунӣ пайдо намудани ҳукми суд;
  • ӯ барои содир кардани ҷиноят маҳкум шуда бошад - то адои (иҷрои) мӯҳлати ҷазо ё то озод шудан аз ҷазо;
  • ӯ аз иҷрои ӯҳдадориҳои ба дӯшаш гузоштаи суд саркашӣ кунад - то иҷрои ӯҳдадориҳо;
  • ӯ дар бораи худ маълумоти бардурӯғ дода бошад;
  • нисбат ба ӯ дар суд даъвои шаҳрвандӣ пешниҳод шуда бошад - то ба охир расидани пешбурди парванда;
  • ӯ тибқи ҳукми суд ретсидивисти ниҳоят хавфнок дониста шуда бошад ва ё зери назорати маъмурии милитсия қарор дошта бошад - то бартараф гардидани доғи судӣ ва ё ба итмом расидани мӯҳлати назорат;
  • ӯ мутобиқи қонунгузории Ҷумҳурии Тоҷикистон ба хизмати ҳарбӣ даъват шуда бошад - то ба итмом расидани мӯҳлати адои хизмати ҳарбӣ.