Машваратҳои байни вазоратҳои корҳои хориҷӣ
Миёни Тоҷикистону Австрия шурӯъ аз соли 2007 абзори машваратҳои сиёсии байни вазоратҳои корҳои хориҷӣ ба роҳ монда шудааст. 30 июни 2022 дар Вена даври даҳуми ройзаниҳои сиёсӣ байни вазоратҳои корҳои хориҷии Ҷумҳурии Тоҷикистон ва Ҷумҳурии Австрия баргузор шуд. Ҳайатҳои тарафҳоро Муовини вазири корҳои хориҷии Тоҷикистон Фарҳод Салим ва Сардори Департаменти Аврупои Шарқӣ, Қафқози Ҷанубӣ, Осиёи Марказӣ, сиёсати ҳамҷавории шарқии Иттиҳоди Аврупо ва шарикии шарқии Аврупои марказии Вазорати федералии корҳои аврупоӣ ва хориҷии Ҷумҳурии Австрия Герҳард Зайллер роҳбарӣ карданд.
Зимни машваратҳо маҷмуи васеи масъалаҳои рушди равобити дуҷонибаи Тоҷикистону Австрия дар соҳаҳои сиёсӣ, иқтисодӣ, фарҳангӣ, маориф ва амният баррасӣ карда мешаванд.
Миёни Тоҷикистону Маҷористон шурӯъ аз соли 2016 абзори машваратҳои сиёсии байни вазоратҳои корҳои хориҷӣ ба роҳ монда шудааст.
28 ноябри соли 2016 дар ш.Будапешт дар доираи иштироки Президенти Ҷумҳурии Тоҷикистон дар Саммити оби Будапешт-2016 машваратҳои сиёсии байниидоравӣ дар сатҳи вазирони корҳои хориҷии Тоҷикистон ва Маҷористон барпо шуданд. Зимни машваратҳо ҷонибҳо масъалаҳои мубрами инкишофи ҳамкориҳои сиёсӣ ва муносибатҳои Тоҷикистону Маҷористон дар соҳаҳои иқтисоду тиҷорат, сармоягузорӣ, маориф ва фарҳанг, инчунин дигар самтҳои мавриди эҳтимоми муштаракро муҳокима намуданд. Дар фарҷоми машваратҳои сиёсӣ вазирони корҳои хориҷии ду кишвар Сироҷиддин Муҳриддин ва Петер Сийярто Барномаи ҳамкорӣ миёни Вазорати корҳои хориҷии Ҷумҳурии Тоҷикистон ва Вазорати корҳои хориҷӣ ва тиҷорати Маҷористонро барои давраи солҳои 2017-2021 ба имзо расониданд.
Миёни Тоҷикистону Руминия шурӯъ аз соли 2018 абзори машваратҳои сиёсии байни вазоратҳои корҳои хориҷӣ ба роҳ монда шудааст.
Дар заминаи муносибатҳои судманд апрели соли 2018 ба мақсади боз ҳам таҳким додани ҳамкориҳои дуҷониба машваратҳои сиёсӣ миёни Ҷумҳурии Тоҷикистон ва Руминия (дар шаҳри Бухарест) бо иштироки Муовини вазири корҳои хориҷии Ҷумҳурии Тоҷикистон Музаффар Ҳусейнзода ва Котиби давлатии Руминия Дан Никулаеску доир гардид.
Машваратҳои сиёсии ду кишвар заминаи асосии тавсеаи ҳамкориҳо вобаста ба таъсиси Комиссияи муштараки байнидавлатӣ оид ба ҳамкории иқтисодӣ, тиҷоратӣ ва илмӣ-техникӣ, инчунин имконоти таҳияи як созишнома ё нақшаи амал бо инъикоси зарфиятҳои мавҷуда ва авлавиятҳои ҳарду кишвар ба ҳисоб меравад.
