Иштирок дар вохӯрии муовинони вазирони корҳои хориҷии кишварҳои Осиёи Марказӣ

28 ноябри соли 2023 дар шаҳри Бишкеки Қирғизистон муовини вазири корҳои хориҷии Ҷумҳурии Тоҷикистон Фарҳод Салим дар вохӯрии 13-уми муовинони вазирони корҳои хориҷии кишварҳои Осиёи Марказӣ, ки аз ҷониби Маркази минтақавии СММ оид ба дипломатияи боздоранда дар Осиёи Марказӣ (UNRCCA) танзим гардид, иштирок ва суханронӣ намуд.

Аснои нишаст иштирокдорон мавзуоти марбут ба зарурати чораандешии дастаҷамъона ба мақсади  мубориза алайҳи таҳдиду чолишҳои замони муосир, аз ҷумла терроризму ифротгароӣ, гардиши ғайриқонунии маводди мухаддир, ҷиноятҳои муташаккил, тағйирёбии иқлим ва дигар масоили мубрамро матраҳ намуданд.

Муовини вазир диққати ширкаткунандагонро ба азму талошҳои Ҳукумати Ҷумҳурии Тоҷикистон дар амри таҳкими сулҳу субот дар кишвар ва минтақа, тасмимоти Тоҷикистон дар самти обу иқлим ва мубориза бо чолишҳои замони муосир ҷалб намуд.

Ҳамзамон аҳаммияти густариши ҳамкорӣ миёни кишварҳои Осиёи Марказӣ, алалхусус дар доираи Маркази минтақавии СММ оид ба дипломатияи боздоранда барои Осиёи Марказӣ таъкид гардид.

Саҳифаҳои расмии Вазорати корҳои хориҷии Ҷумҳурии Тоҷикистон дар шабакаҳои иҷтимоӣ:

Мо дар Фейсбук: www.facebook.com/mfa.tj

Мо дар Твиттер (русӣ): www.twitter.com/MID_Tajikistan

Мо дар Телеграм: t.me/mfa_tj

Мо дар Инстаграм: instagram.com/mfa_tjk

Мо дар Твиттер (англисӣ): twitter.com/MOFA_Tajikistan